Thufim khanpui 8

Fiimhnaak Thangphat

8 Ngaai tu! Fiimhnaak in na ko ii, Lingthilhnaak khiah au hnelhno ii.
2 Lamkhung hiang ai mual phundiir vum ah le, Lam kheek ah ding ai,
3 Khuapui tlum hmun kawldawng ah au ai,
4 “Mihing te, ning ngeen ing, Laivum um mi zongzong ning ko ing.
5 Ruathnaak lam ai puikim laailo te, puikim tuh in zir tu ih.
Lungmutlawm te, khuaruah pha zir tu ih.
6 A pha hlaihlawr I thu te ngaai tu ih, I reel hnaak heh dik ii.
7 I reel hnaak heh thutak ii. Thudon heh I cim hnaak ber ii.
8 I kaa an suak hnaak thu zongzong heh dik ii, Mi khelh ruai hnaak le
diklo um lo ii.
9 Lingthiltu te caa tu fian sek ai, Fiimhnaak hmutu te caa ah dik sek ii.
10 Tangka tah in ning ruai ing cia riil tu sawn ih, Sui phaber tah in
fiimhnaak riil tu sawn ih.
11 “Kai heh fiimhnaak ing ai, lungvaar tah in pha sawn ing, Na daih
hnaak zai thawn khai saanteh thil tuh lo ii si.
12 Kai heh fiimhnaak ing ai, lingthilhnaak khai nai ing. Linhnaak le
thukhan thilhnaak nai ing.
13 Bawipa kihzah heh sualhnaak cim ii hang. Hngal le puar, lamkhung
sual te, pong diklo te cim ing.
14 Khuakhan bawntumhnaak nai ing khaw bawn pet sek ing, Lingthilhnaak
nai ai I haat ii.
15 Ram uk naper ah kumpibawi te bawn ing, Ram ukhnaak daan pha bawn
tuh in uktu te bawm ing,
16 Laivum ai ram uktu te, ram napertu te le, Ukhnaak lam ai upa te
hmuah khiah kaimah bawm hnaak thawn ram uk ii.
17 I iitu te iit ing, I siitu in I tawk tuh ii.
18 Naihhnaak le hmingthanghnaak nai ing, Sum le saw nai ing ai mi nai nung ing.
19 I hnen an na ngah hnaak te tu, A pha ber sui le nguun tahin pha sawn ii.
20 Dikcanghnaak lampui ah feh ing, Lampui dik khiah hluun ing.
21 I iittu te khiah nai ruai ai, Amah te inn heh hlawnthil thawn dim
ing. 22 “Bawipa in he hlaanlaai ai a thil bawn hnaak lakah, Kaimah I
bawn hmasaber ii.
23 Laipua seem hlaan ah kaimah heh hmasaber ai bawn hnaak ii.
24 Tipuithuanthum le ruunpui te um hlaan ah I suak zo ii.
25 Mual le tlaang te um hlaan ah, I suak zo ii.
26 Laipua le ram te le kut zawi dim laivut a bawn hlaan ah Pathian in
I bawn zo ii.
27 Vaan a bawn teng le tipuithuanthum a bawn tengah um zo ing.
28 Mairo te vaan ah hon dah tengah ii seh, Tipuithuanthum tihnaar te a
um ruai tengah ii seh;
29 Tipui te a puut hmun tah ai saang sawn ah kaai tuh lo thu pe teng
ah um zo ing. Laipuapui a ham toh tengah khai um ing.
30 Naupang bangin a hiang ah um ing, Nisiar ai a aanghnaak heh kaimah
ing, A hmaai ah I aang tuh tio ii.
31 Laivumpui le a vum um mihing te kongcung ah, Thin I khim ii.
32 I faa te, I reel hnaak thu ngaai tu ih. I reel hnaak bangin bawn tu
ih lai ning nung ngaai.
33 Ning cuuk ing cia ngaai tu ih lai, fiim tu ih, I thu zainam lo in um mah ih.
34 I thu ngaai ai nisiar I dawngkhaam hiang ah um ai, Inn song I tlum
tuh lo iangtu khiah aang tuh ii.
35 Kaimah I hmutu in nunhnaak ngah tuh ai, A kongcung ah Bawipa aang tuh ii.
36 Kaimah I tawk lotu heh amah nunhnaak hnawmcantu ii ai, I huatu heh
a thi hiamtu ii.