Thufim khanpui 28

Thufiim 28 : 1 – 28

28:1 Mi phalo tu aisu hnawn lo hnaak in tlaan ii, Ikhalselai midik mifel tu kiosa bangin raalpha ii.
2 Rampui pakhat sual fangin uktu pakhat hnua pakhat thuul zianzo ii, Ikhalselai rampui pakhat in mifiim le khuaruat thiam hoitu nai lekhaw, cia ram khiah cak ai raipui kho ii.
3 Farah te reem ai harsahnaak petu ram uktu heh, Lo rong hnawm ruaitu ruah saarha thawn bang ii.
4 Daan zainam lo in um lesikhaw mi phalo phiar ii si, Ikhalselai daan hluun lesikhaw, mi phalo tawngtu ii si.
5 Misual te in thudik heh zaibang ii ti ling lo ii, Ikhalselai Pathian biatu te in a fian in ling ii.
6 Dikcang lo pui ai minai ii tah in, Dikcang ngaai ai farah pha sawn ii.
7 Daan hluuntu tlangvaal heh mifiim ii, Rong-aak komtu in a pa hmaai riim ruaitu ii.
8 Mi hnen an tangka puu le miat lang ai na lian ilekhaw, Na naih hnaak khiah mi farah te ninghiotu hnen ah hleng leh tuh ii
9 Daan hluun hlah lesikhaw na sawngeen hnaak khiah Pathian thinraw ruaitu sawn ii.
10 Mikuung pakhat nun sual tuh in zawl lesikhaw, Nangmah veve cia sualhnaak ah tawi duun tuh ii si. Zai mawhhnaak khai nai lo tu in laksawng pha ngah tu ii.
11 Minai te in amah te veve mifiim roh in ngaaisung de ii, ikhalselai mi thin lingtu farah pakhat khiah fiim sawn ii.
12 Mi pha pakhat khiah uktu bawi cang fangin mi zongzong aang ii, Ikhalselai mi phalo te mi uktu cang fangin mi zapui te relh sek ii.
13 Na sualhnaak thup caai lesikhaw, na nun song zaikhai bawn pet tuh awng lo ii si, Na sualhnaak phuangtu lai lon tu, Ciafangin Pathian in ning na hio ngaai.
14 Pathian khiah kihzah tu tio lai thin na nuam ngaai, Na thin kuruh lekhaw na nunhnaak hnawm tuh ii.
15 Mi-uk phalo te kut hnia ah farah te in phiartu nai lo ii, Ciabang mi uktu tu, kiosa huuk, le vom vaak te bang in laukuul ii.
16 Khuaruah nai cel lo mi uktu khiah mi phalo mi siakha ii. Diklohnaak cimtu in raipui tian ram uk tuh ii.
17 Laai reektu heh amah hlaankua rang roh ai cotu ii. Kham tuh hnaak ilo ii.
18 Tluangtlam tu lai na him tuh ii. Na khuaruah tluang hlahlekhaw rinlopui in khurkua ah na tlok tuh ii.
19 Lo vaai kol te in aihpha tampui nai ii. Tikcuu lovaang ai bo ruaitu khiah farah tio tuh ii.
20 Mi dikcang le mi kuung in nuam le khimliang nunhnaak nai ii Ikhalselai rang ze ai nai na hiam lekhaw na cawh tuh ii.
21 Mi thia nai heh pha lo ii, Ikhalselai mi haatlam in tu nawhthuh tlawmniu daih maanin thu reel khelh de ii.
22 Pamhap tein a rang ai nai hiam ze maanin, Farahhnaak kin hleng dawn ii hang ti ling duun lo ii.
23 Mi pakhat khelhhnaak rem sah tu lai, A hnualam fangin na zawl hlelhlo tah in aang tuh sawn ii.
24 Nu le pa thil ru khiah khelh lo ii ti ai ngaaisung tu khiah ruko thawn dang duun lo ii.
25 Pamhaphnaak in harsahnaak leek suak ruai ii, Pathian ring tu lai na hnem sawn ngaai.
26 Mah khuaruah leek ring heh voi thu ii, Na tah ai fiim sawn te cuukhnaak hluun tu lai na him tuh ii.
27 Farah te thil suum tu lai, zaikom in khai na sam tuh lo ii, Farah te zaangtaak lesikhaw mi tampui in awr na siat tuh ii.
28 Mi phalo te bawi cang fangin zapui te relh sek ii, Ikhalselai mi phalo te nau fangin midikcang le mikuung te in ram uk leh tuh ii.