Thufim khanpui 12

12 Fiimhnaak daihtu te sual khelh fangin thu reel daih ii.
Thureelhnaak daih lotu tu lungmutlawm ii.
2 Bawipa in mi pha te lawm ii, Ikhalselai phatlohnaak bawn tuh reeltu
te hnawl ii.
3 Phatlohnak in mi khaakber lo ii, Ikhalselai mi dikcang te tu kho roh
in ding ii.
4 Nupui pha tu a pasal sui lukhuk ii, Ikhalselai a pasal zakthi ruaitu
nupui khiah, A ruh song ai khensar uurhnaak bang ii.
5 Mi dikcang in tu thintluang niu in mi kom ii, Mi phalo te in tu mi
zawl tuh leek ruat ii.
6 Mi phalo te ponkam tu mi reek tuh hnaak thu ii, Ikhalselai midik te
ponkam in mi o ii.
7 Mi phalo te tu thihhnaak tawk ai cii hmit ii, Ikhalselai mi dikcang
te innkua khiah kho ngaai in um ii.
8 Mifiim ilesikhaw mi in na lawm tuh ii, Thinlung pha lo ilesikhaw mi
in zoh na suam ngaai.
9 Mah nunhnaak caa naa per beetbotu mizaran ii tuh khiah, Mi thupui
roh bang ai um bawn ai riikaam tah in pha sawn ii.
10 Mi pha te in a sumhnam kilkhawl ii, Ikhalselai mi phalo te in amah
te sumhnam ninghio lo ii.
11 Thakol lovaaipa in aihtuh tampui nai ii, Ikhalselai zai hnempuilo
naa per ai a cuu bo ruaitu khiah mivoi ii.
12 Mi phalo te daih hnaak thil tu thil phalo bawn tuh sii khiah ii
hang, Ikhalselai mi dikcang te tu kho roh in ding ii.
13 Mi phalo tu amah ponkam in awk ii, Ikhalselai mi pha pa tu
harsahnaak an amah thu luat ruai duun ii.
14 Na reel hnaak le na bawn hnaak ah na ngah tuh um ii. Nangmah caca
in ngah tuh ii si.
15 Lungmutlawm te in kin dik ii tiin ruat duun tio de ii, Mifiim te in
tu mi khuaruah pehnaak saang ii.
16 Lungmutlawm te in a thinrawhnaak laar ruai vual ii, Mifiim in tu,
mi zohsuamhnaak rin dapniu in tuar ii.
17 Thudik na reel maan in dikcanghnaak laar ruai ii. Ikhalselai thudon
in thudiklo lam ah mi hoi ii.
18 Khuaruah nai cel lo ponkam in vaangsau sun hnaak bangin thuuk roh
in mi sun ii, Ikhalselai mifiim ponkam in hmaihma lawm ruai ii.
19 Thu don heh a san com ii, Ikhalselai thudik tu kumzaangza kho ii.
20 Phatlohnaak bawn tuh thureeltu khiah amah veve zawl tu ii,
Ikhalselai daphnaak remreeltu te hnenah aanghnaak um ii.
21 Mi dikcang te kongcung ah thil phalo hleng lo ii, Ikhalselai mi
phalo te in tu harsahnaak leek tawk ii.
22 Bawipa in thudon reel tu te ciim ii, Ikhalselai mi dikcang tu aan ii.
23 Mifiim te in a linhnaak thup ii, Ikhalselai lungmutlawm te in tu, a
voi hnaak laar ruai de ii.
24 Na naper haathnaak in huthawm na pe tuh ai, Thazawnghnaak in sal na
can tuh ii.
25 Thincawlhnaak in na aanghnaak hnawn tuh teu ii, Ikhalselai
iithnaak, ngaihharhnaak ponkam in thazaang na pe tuh ii.
26 Mi dikcang pa khiah rualpui konghoitu ii, Ikhalselai mi phalo pa
lampui in rualpui te lam khelh ruai ii.
27 Tha na zawng lekhaw na sii hnaak ngah tuh awng lo ii si, Inapui ai,
tha na kol lekhaw na lian tuh ii.
28 Dikcanghnaak khiah nunhnaak lampui ii; Phatlohnaak tu thihhnak lampui ii.