Thufim khanpui 11

11 Cuai hmaanlo hmangtu te khiah Bawipa in cim ii, Ikhalselai cuailung
hmaan te aan ii.
2 A hngal te in mi zohsuam tawk tuh ii, Ciamaanin, hniatacuh pha sawn ii.
3 Mi pha khiah dikcanghnaak in kong hoi ii, Santlaaklo te tu amah te
dikcanglo hnaak in hnawmcan ii.
4 Thih niakhua hleng fangin naihhnaak heh hnempui lo ii. Ikhalselai
dikcanghnaak in na nunhnaak na o thil tuh ii.
5 Dikcanghnaak in mi pha pa nunhnaak nuam ruai ii. Ikhalselai mi phalo
te tu, amah te phatlohnaak in amah te nunhnaak sawn ruai ii.
6 Dikcanghnaak in mi dikcang luat ruai ii, Ikhalselai santlaaklo tu, a
pamhaphnaak in awk ii hang.
7 Mi phalo pa thi fangin amah uumhnaak khai thi fawm ii. Naihhnaak
ringtu khaih zaikhai hnempui lo ii.
8 Mi dikcang te tu harsahnaak song in o ai, Mi phalo te hnen sawn ah
harsahnaak hleng ii.
9 Pathian zainam lotu te ponkam in hnawm na can thai ii, Ikhalselai mi
dikcang te fiimhnaak in na o thai ii.
10 Mi dikcang te bawngphathnak tawk fangin khuapui in aang ii, Mi
phalo thi fangin aang ai au tlaang ii.
11 Mi dikcang te in hmuifu pe fangin khua heh hon khang ii, Ikhalselai
mi phalo te ponkam in khua hnawm ruai ii.
12 Mi zohsuamhnaak ponkam hmangtu khiah mivoi ii, Na fiim lekhaw na pon suup tu.
13 Kaatam te’n thuthup phuang de ii, Ikhalselai ringtlaak te in tu thup ben ii.
14 Konghoihnaak um hlah lekhaw ram hnawm ii, Khuaruah pha petu tam
hmun ah himhnaak um ii.
15 Na ling awng lo hnaak pa caa laiba ruul sah lesikhaw, na sir leh
tuh ii. Paaipawh hlah silai na caa pha sawn ii.
16 Mi ngaiharthai nupang khiah mi in zuul ii, Ikhalselai ziaza pha nai
lo nu heh zakthih kuul ii.
Thazawng in sum le saw nai tuh awng lo ii, Ikhalselai thakol te khiah
lian tuh ii.
17 Mi ninghiothai ilesikhaw nangmah veve hmaaipha pe duun ii si, Mi
ninghio nai lo ilesikhaw, nangmah veve hnawmcan duun ii si.
18 Mi phalo tein hnempuihnaak taktak tawk thil lo ii, Ikhalselai
thildik bawn lesikhaw perman ngah tuh fefo ii si.
19 Aisu khai phathnaak bawn tuh ngaaisungtu khiah nung tuh ii,
Ikhalselai phatlohnaak bawn tiotu aisu khai thi tuh ii.
20 Bawipa in thinlung pha lo te cim ii, Ikhalselai thildik bawntu te daih ii.
21 Mi phalo te khiah reem ii tuh ii ti fian ii, Ikhalselai mi dikcang
te luat tuh ii.
22 Mawi roh napui, khuaruah thiam lo nupang khiah, Vok hnaar ai sui
vuh sah bang ii.
23 Mipha te daihhnaak in phathnaak suahpui de ii, Mi phalo te in amah
te daihhnaak ngah fangin mi zongzong thinraw ii.
24 Mi haatlam te tu siang roh in tangka mi pe khalselai, nai aamaam
ii, Mi sam te in suup khalselai farah aamaam ii.
25 Siang in nung tu lai nai tuh ii si, Mi bawm tu lai, mi in na bawm tuh ve ii.
26 A man khang iang ai rong zuar sianglotu khiah mi in awrsiat ii,
Ikhalselai a zuar siangtu khiah mi in aan ii.
27 Na bawntumhnaak pha lekhaw mi in na zuul tuh ii, Ikhalselai
harsahnaak sii lesikhaw tawk tuh ii si.
28 Naihhnaak ringtu te khiah khuakhaal thing hnah bangin tlok tuh ii,
Ikhalselai mi dikcang te tu tlim bangin hing tuh hleen ii.
29 A innsaang ai harsahnaak hleng ruaitu khiah, A tawpkhum ah zaikhai
nai tuh lo ii.
Lungmutlawm te khiah mifiim te omhlawh ii tuh tio ii.
30 Dikcanghnaak ai a thai khaih nunhnaak ii, Ikhalselai phatlohnaak in
nunhnaak paai ruai ii.
31 Mi pha tein laivum ah phat man co lekhaw, Mi phalo le misual tein
zaizah cawhkuan ngah ngaai ti heh fian ii.