Thufim khanpui 30

Thufiim 30 : 1 – 33

Agur Pong Hnaak

30:1 Hete heh Jakeh fapa Agur pong hnaak ii: “Aw Pathian, thin I cawl ii, I thazaang khai cawl sek ii hang. Zaikhai bawn ben nawn lo ing.
2 Kai tu ramsa bang ii hang ing, mihing bang ii lo hang ing. Mihing thinlung khai nai nawn lo ing.
3 Fiimthiamhnaak khai zir awng lo ing, Pathian thu zaikhai ling awng lo ing.
4 Vaancung thula ling sektu aisu um ii? Aisu in hlivua pom thil ii? Ihlahle ponher thawn ti fuun thiam aisu um ii? Ihlahle aisu in lai le vaan rii khan thil ii? Ciami pa aisu ii? Ling aw sim? A fapa tang aisu ii?
5 “Pathian ponkam caang in dik ii; Amah khiah khaakber siitu caa raalphaw ii.
6 Pathian ponkam lo beet mah, Na hau ngaai khaw na thudon hnaak laang ruai tuh ii.”
 
 Thufiim Samdang Te

7 “Aw Pathian, na hnen an thil pahnih na ngeen ing, I thih hlaan ah I co ruai tu:
8 Thudontu ii tuh loin I kiil tu; Farah ze le lian ze in khai I bawn mah lai, I kham tuakteng leek rong I pe tu hraam.”
9 Thil tampui nai le ingkhaw ‘Bawipa I kuul lo ii,’ ti khelh mah ngaang, I farah ze lekhaw ruu ko ngaang khaw, I Pathian hming thangsia ruai sual mah ngaang.
10 Zaikom in khai omhlawh khiah a bawipa hmaai ah sawi mah, Sawi lesikhaw omhlawhpa in awr na siat ngaai khaw zak na thi tuh ii.
11 Pa te awr siat ai, Nu le pa thin khing lotu um ii.
12 Riim roh napui ai mah veve I cianghlim roh ii ti ai ruat duuntu um ii.
13 Mi pha roh ing ti ai ruat duuntu um ii, amah te veve mi phaber in ruat duun ii!
14 Farah le nun har te kongcung ah liansia ai nungtu um ii, Ciatih in pum cawm duun ii.
15 Vot in fanu pahnih nai ai, a hming tu “I pe tu” ti veve ii. Kham ti nia nai lo thil pathum um ii, “Tuak zo hang” ti awng lotu thil pali um ii:
16 Ciate tu, mithi khua, fanailo nu cing, Ruahti haal roh laipua ro le, hmit thilh lo maiko te ii.
17 Aisu khai a pa hnihsa ai reeltu le, A nu hausa fang ai zohsuamtu khiah, Langtar in a sa ai tuh ai, lang-aak in a mit kuat tuh ii.
18 Kai caa ngaihtampha thu thuuk pathum um ii; I ling thil lo hnaak thil pali um ii:
19 Vaan hlivua lak ai zuang mupui ai a lamkhung, Lung vum ai vaak ruul lamkhung, Tipui vum ai feh khawm pui lamkhung le, Nupang le pasal tlaak duun hnaak lamkhung te ii.
20 Nupui nun kuunglo mer daan tu hetih ii: Pasal sam thawn sual ai takhlu ben hnua ah “Zai sualhnaak khai bawn lo ing,” ti ii.
21 Laipua ai a hlawngpui hnaak thil pathum um ii, Laipua ai ong ben lo hnaak thil pali um ii:
22 Kumpibawi hon cangtu sal, Rong duhduh aihtuh nai mivoi.
23 Mitkamkuul napui ai pasal nai ben thotho nupang le a bawinu umhmun suttu omhlawhnu te ii hang.
24 A ciik roh napui a fiim roh ramsa pali laivum ah um ii:
25 Ciami te tu: tha haat lo napui ai Khaal ah rong khawl ciatu sirsing;
26 Haat napui lo ai khu lak ai kua bawntu samaingaan.
27 Kumpibawi nai napui lo ai, A rualrual ai thawntu khokhuak,
28 Na kut inkhai huam thil ai, Kumpibawi inn song ah khai na hmu thil hnaak dildiit te ii.
29 A vaak teng ai hmuh nuam thil pathum um ii;
30 Cia te tu ramsa lak ai a haat ber le zai khai kih lo kiosa.
31 Mecang, arcang puar le a kuthnia te hmaai ai vaak hngualhngo tu kumpibawi te ii.
32 Voi thu maan in na puar ai, Thil phalo bawn tum lesikhaw, Com tu lai, ngaaisung tu rih.
33 Hnawi cawk dekdo lesikhaw thawphaat ngah ii si, Mi pakhat ai hnaar viit sah lesikhaw thii suak ii. Na thin so ruai lesikhaw thu hnok harsa tawk ii si.