Thufim khanpui 13

13 Fapa fiim in a pa in thu reel fangin ngaai ii, Ikhalselai mipuar in
tu sual peu ing ti awng lo ii.
2 Mi pha in a ponkam thai ai tuh ii, Ikhalselai mi zawlthai te in
phatlohnaak leek caak ii.
3 Na reel hnaak raalring tu lai, na nunhnaak hup tu. Raalring lo ai
pongtu khiah amah veve hnawmcan duun ii.
4 Thazawng in a thin song an thil daih roh de ii; Ikhalselai, zaikhai
ngah hluan lo ii. Naper khung per tu in a daihhnaak caang ngah tuh ii.
5 Mi dik te in tu thu diklo cim ii. Ikhalselai mi phalo ponkam te tu
zakthihkuul le ningdulkuul ii.
6 Dikcanghnaak in mawhnailo te khaakber ii, Phatlohnaak heh misual te
tluhnaak ii.
7 Mi haatlam tu minai bangin um ii, Ikhalselai zaikhai nai lo ii; Mi
haatlam tu farah bangin um ii, Ikhalselai thilri tampui nai ii.
8 Minai in amah te nunhnaak tlanhnaak tuh tangka hman pha nai ii,
Ikhalselai mi farah khiah aisu in khai reek tum lo ii.
9 Mi dikcang te vaarhnaak heh a vaar aam bang ii, Mi phalo te mai-inn
tu dit leh tuh vual ii.
10 Puarhnaak in tu harsahnaak leek suah ii, Misam te ruahhnaak ngeen
heh phasawn ii.
11 Baai niu ai na ngah hnaak na thilnaih heh zaicamlo pah paai ruai
tuh ii si. Harsa roh ai na hlawh hnaak tu rai roh na tha tuh ii.
12 Uumhnaak ngah lo fangin thin uur ii, Ikhalselai daihhnaak khim
lekhaw nun heh aanghnaak thawn khim ii.
13 Thureel hnaak thu zainam lotu te khiah, Amah te veve hnawmcan duun
tuh ii. Thureel hnaak hluuntu te him tuh ii.
14 Mifiim te cuukhnaak heh nunhnaak cirhti ii, Na nunhnaak kihkuul
song ai a um fangin, Ciami te in na luat ruai tuh ii.
15 Fiimhnaak in zuulhnaak hlawh ii, Ikhalselai sangtlaaklo te tu
hnophnaak lamkhung hluun ii.
16 Mifiim te tu, thil bawn hlaan ah khua ruat de ii, Ikhalselai
lungmutlawm te in tu, a voi hnaak sawn phuang ii.
17 Ringtlaak lo khuasaptu te in harsahnaak hleng ruai ii, Ikhalselai
ringtlaak nalaang te in tu daphnaak suak ruai ii.
18 Thureelhnaak hluunlo heh farah hnaak le mualpho hnaak ii,
Ikhalselai thureelhnaak hluuntu in zuulhnaak ngah tuh ii.
19 Mah daihhnaak ngah heh zaizah in pha ii, Lungmutlawm te in tu,
phatlohnaak an letleh tuh nuam lo ii.
20 Mifiim te kom tu lai na fiim tuh ii, Lungmutlawm kom lesikhaw harsa
tawk tuh ii si.
21 Misual te khiah harsahnaak in konzongha ah hluun ii, Ikhalselai mi
dikcang te tu phathnaak laksawng co tuh ii.
22 Mi pha in a tu le a faa tian a naihhnaak ro siah tuh ii, Ikhalselai
misual te naihhnaak tu midik te kut ah hleng tuh ii.
23 Vaai lo hnaak lo song an farah te caa rong tampui suak tuh napui
ai, A cang ai thu reel lo mihing te’n vaai siang lo ii.
24 Na fapa hriing hlahlesikhaw, iit lo ii si. Iit lesikhaw thu cuuk tuh ii si.
25 Mi dikcang te in aihpha rong nai ii, Ikhalselai mi phalo te tu a
rii kaam tuh tio ii.