I hmin tu Sui Sui i. I sam heh kodar tah hnak in sau aung lo i, miin na mit mawi ngai i ti de man mittial nei ing ti heh hih dun de ing, I ruangrai ngawn punghman hlen i inapui I ngo ze hang lo napuikhaw biangkhur nei ing cen i hmaifang khai I nu sun in a bial thah lam in i suak i.
Keitu i nu leh pa ai zar ah tlawng khai heh keimah tawk nio in kai ben ve hlen zian zo ing. I "ba-wah" ah I tlawngkai lai heh I ngai ber de hak i, rualpui pawl thawn kin hiam lai can te pawl tuncan ah cen maw keimah lekin lêng ruah ro in I um can fang hlanlai ai I "ba-wah" ngaiin I biang ah mithli kham zauh lo in luang zut zo de i. ''
tam ze ngan lo in I subject ah lut tei to a sing''
Phun sarih i kai kum tu I hmui suak lai teng ituh i tlangval pawl in I fem hiam ngai ngai de aung i. Veikhat tu khaan sung ah I tauh hmun I ham nio ah kin khua pa a hmin tu John (
John thawn khua khat napui nel dun ze de lo i ing) in i ham ah to ai I ruat ban lo puiin ithnak thu i lo rel dek le a la la I hmaisawng ngai ai um khai thiam tum lo ing inapuikhaw a cang thei tawp in sup ten to ing inapui I hmai san sio le I aw khai hlin sio khaw I lunghlin hnak rinaw pawl a cawm ze hnak man I thinlung in I khaansa dan tu a niin ling thiam tuh sio i tih um ing....
(John heh fenu nei aung lo tih lin ngai ve i, I sah fang a tha hlin dan leh a khur dan pawl cen a hmai heh meiling kang lio hnak pah pah in sa sio dan, a mi rel hnak ithnak zilthil pawl khai tipuithuanthum ti suar suar bang in yiang rel i tih phataktaiin ling fiang har ngai dan in cen a ttang ze hnak in a hlan khai suak dan etc heang pawl in ling thiam sio ing.
John in he bang thu I rel tuh heh a rei ngai iang ttei tto tu ing, keimah heh nupang sawn man rel hlan ta mawi lo man in kum rei ngai tiang sup ttei tto de napui ing khaw tunah tu amah sawn in ithhnakthu I rel kio hang man I thin diriam law law i hang. John heh I naupang lai pah in uar thah cia reng reng man in i sah le khaw yes tuh heh a bawh cia ttio tu ing ai ciaman ciania ai I sah nia March 27-2010 nia tu a phi pe cih ve ing. He March 27 a hleng cang I thinlungsung ai um tio tu John na ngai I luar sin sin de i, a liam zo can pawl let leh sal thil selai tiin mithli thawn na ngai in lungsir vansang in kap hnel hno de ing.
John thuhla cawm nio
John tu mi ngo thah, taksa ruangrai ca ngai i cen pawng tam ze lo, zan fang kin inn hmai ah i cuan kawng in kittha (guitar) tum in hla sa thei ngai tu i, cen I vumah a pha ze de hleihlawr man in a ni ni in daih te te ing nikhat ah veikhat hmu lo in khai um ben de lo ing. Ciatin nisiar in tlawngin (school) ah tawk dun tio de i ing ai kin tlawng ah khai kin daihdun thu mi hmuah hmuah in kin ling sio i, inapui I pawi bul lo i yiangman ti fang in tu John in I daih ngai ngai ii le a nupui tuh in i daih peu peu i tih heh ling fiang ngai man in ing.
Ciatin kin khua ah phun 8 I aung lio hnua tu Tahan lam ah peh vivo ing keitu, inapui John tu sisuangvaitheu fa i man in tlawng peh ben lo in naper lamah feh ai ciatin khua dang pui ve ve ah um bang kin cang hang man nisiar in tawk dun ben lo in um napui i ing khaw John tu na kawl ngaiin per ai i tlawng ben tuh heh lo iang hlen de i. Khua ah tlung leng khaw John tu kin inn hmai lei nio ah kittha tum in hla sa kawng in I lo cuan de i zan nazi 10 lam tiang.
(Kin inn hmai zan hlavar hnia ai a sa de hnak hla pawl heh tunah cen maw keimah lekin mithli thawn John zun phur in pawi ti cuah co ngai kawng in I khuahluan nio ah ngai de i hang ing).
John thawn kin daihdun hnak heh kum rei zian zo ai kin khuaruatte pawl lo hleng ziang zo ai kin pahnih in innsang din kin hiam hang man John in nang tlawngkai tu hrih lei kei India ah naper feh ang khaw i tlung leh sal fangin nupa a sing tiin I ti ai ciatin a ni tu India ah sum si in feh ai keitu Tahan lam ah tlawngkai peh leh sal ing.
John khual tlawng hnua
John khual a tlawng lio hnua tu I lungleng in zansiar nisiar in John a zun uai in rawng khai phantak in ei ben de lo ing. He tih rori in John zun heh uai lo har tuh tih heh i ruat tah hnak cung ing harsa ti sawn ing -tuar thiam de lo ing. Inapui John tu mifel ngai i ai kin khuapuite kristmas khua ah hmang tuh pawl tlung um le khaw lai I kuat zur zo de ai, cia lai khiah siar kham thil de lo man veisawm veiza lai siar not dek de ing..
John tu ram hla pui ah innsang kin din hnak tuh in sum a si hliah hlo teng lai ah veikhat tu khua ah I tlung fang in I nu leh pa in "Sui nang heh tlawngkai le nangmah tawk in ben zo si ai ciaman in innsang lam tang kawntin ruat pa si"? tiin I zawt ai I thin duk duk sa cawm ze le aisu thawn tiin zawt leh sal ing ai anite in USA in i khaw tiin I rul leh sal fang in cen maw John hnak hih ruang ro ing.
Heang thuhla pawl heh John in lo ling i tuh ing a rang thei ber in khua ah lo tlung zur zo ai ciatin tawk dun i ing khaw. John tu i pawn khai ben lo in diik ngai in I kuah ttial ai, aw suak lo pawl in a mithli far hnak sik ing khaw i kut nem nio in nut sah ing cen a ni in- ziang man in he bang thu te te a hlan pah in i rel lo i si tiin I zawt ai. A sawn tuh dan khai thiam lo ing John I ngai thiam tu hram tiin ngaithiam ngen tih lo bak tu keiin yiang khai John hrangah bawn ben hnak nei lo i hang ing. John tu a aw cawm te te in yiangman in he tin i dah i si tiin mithli far zut zo kawng I kuat fawm in I zawt la la ai, a rul dah tuh khai thiam ve lo hang ing, kei khai I mithli luang zut zo ve I hang. I thinlung in cawm ngaiin i riahsia hnak au dek in John hnenah I ngaithiam tu hram, I nu le pa in bawn hnak i tiin sinpiah i hiam napui kin ching dun hmun le mi inn i man sup dun tten tto ing. Cia nia ai John a thin ur dan heh tunnia tiang I ruat leh sal fang tuar pui ngai ve ing, I thin meihma ben hlen ve i lai.
USA in parcel I cah tu pa heh kin khua mi tu i napui I uar phun bul lo ai keimah khai ph in I pawn bul awng lo i veikhat khai. Khua ah a um lai ah khai daih dun awng bul lo I ing. John thawn kin daih dun hnak khai ling sio i cia lai pah in. Inapui khaw kiin ram harsa ah um sawn ti tu USA um pawl in a fapa te hrang nupui tuh heh khua khat ai a fel leh a mawi lam ber a si de i bang pah in I lin lo in I nu leh pa te thawn lo pawn dun sio zo ai, cia ang thu pawl khai I nu leh pa in I rel bul awng lo heh tunnia tiang I thinlung sung in I cinat thil de lo ing inapui a liam zo can cu tiin cil lem kurh ko in tuar hram hram de ing.
Ciatin ni leh hla tu liam zian zo ai March hla hleng leh thio ai USA lam pawl in puai bawn ai India or Malaysia lam ah feh tuh in I nu leh pa nawr i hang. He thu i za ve le tu John hnak harsa ngai kawng in tawk ing khaw i tlan tu lio tiin ti ing, inapui tlan tuh ti fang khai ziang ei tuh ti leh a kawn inn ah um tuh ti heh kin khuaruah har hnak ber i. I nu le pa in le USA pa thawn rori nupa tuh ah lungkhim in man leh mual te le lang zo sio cia hlei ah tangka khai kin kuat hmet de i tam thah ngai ngai in.
USA lam in tangka leh thil dang ah kin bawm hnak a tam ze hang man in I nu le pa thu el tuh rum ro khai I harsa ngai de i, inapui lehlam ah mah daih lo hnak pui thawn kum khua um kawm tuh khai ruat ngam bul de loing. Ciatin i thin rimsu in a ni ni in i rom te te i.
Johnle a thin hiam lo or i tlan ngam lo, I ru kio le khaw I nu leh pa in John te inn sungsang ah buaihnak leh thil i lo lo hleng ruai tuh lau lawi, bak ah man leh mual pawl le pe zo sio cen USA leh khua ah tu USA ai pa nupui tiin I hmin thang zo sio ta si, thil zeizawngza heh nauhciah sio i hang John.
Hebang thuhla pawl man John in I hmu lawk khai hiam de lo napui I hmun lo in le um thil de lo man zan hlavar hnia ah kitha tum in kin inn hmai ah riahsia ngaiin hla sa hnel hno menma de i hang.
Veikhat tu March hla pah i. I nu tein USA pa thawn puai kin bawn hlan nio ah na rualpui pawl thawn na daih bang in um tuh in zan khat can na pe i ing I ti man I rualpui pawl thawn nukhatta te inn ah sanpiuh suan in hiam ngaiin um tlang i ing khaw ciatah John khai lo kawi ve i.
Cen I ham ah to ngeu ai thinpawi leh riahsia ngai mithmai thawn na âng pui ngai ing nang zawng USA hleng tio tuh hang tiin I ti ai ciatin I ti man I thinhnawm leh lungsia tuar ben lo in au hiang ho in John hnak roh ngaiin kuah ing khaw na daih ze ing John tiin I rualpui pawl hmai ah daih ngai leh lungsia ngai kawng in rel ing, John khai um ben ve ce lo i a aw suak lo napui a mithli tu i kodar ah far zut zo ai I angki pawl beh ben sio ve i. Cia ang pawl man in I rualpui pawl in khai chingkaung kin pe ai kin pahnih lek in cia zan tu hiam ngaiin nukhatta te inn ah hmang kawm i ing.
John in Pathian samhri kin sih lo man i tuh i sing tiin thin i hnem ai, inapui kei ngawn i lungsia ze um ben bul lo ing caiman zanvar rori in kap hliah hlo ing.
John thawn hmun khat ah um kawm tuh ti fang le USA lam in tangka tam ze kin kuat zo bak ah puai pawl le bawn tuh hang ciahlei ah mi hmuah hmuah in le USA pa nupui tiin I ling sio zo hang.
John in tu na iang hlen tu pah ing USA na hleng hnua ah khai I ti ai, tunah nang na co lo napui ing khaw kin fa te tu co dun tu hram seh tiin saw ngen de tuh ing I ti ai cia zan tu mitmu kawm lo in zanvar thu nuam rel kawm in um kawm I ing. Inapui kei ngawn I mithli heh kham zauh lo in luang mual mo i John kang nem ah.
Inaupui khaw Cia zan ai John in a aw nem nio thawn nau bang in I thlem dan leh a hmur nem nio in I thut hnak pawl ngawn tunnia tiang ah khai feeling thil lai ing.
USA hleng
Ciatin USA ah tu cak nio in hleng ing khaw I innsangpa in airport ah I cang ai hnuksat dun i ing khaw I tlangvalpa John tu tluk lo law law i. Zanlam fang inn ah hleng i ing. I innsangpa tu single in um de i man a innsung tu a rim law law ningdul kul ngai i, inapuikhaw zei khat pawng lo nio in thian fai sio ing i hleng nia pah in. I hleng ngawm lai ah I pasal in daih ngaiin i kuah hnel hno de napui I yinkhung thil bul lo i. I pasal in i kuah leh ithhnak thu I rel le khaw rin lo pui John hnak ruat ngah de ing khaw I mithli kham zauh lo in far hluah hlo de i. I thin ur ze heh feihmur mei ah hem hnak in I thinlung sung muril teng thiah ah sun zut zo bang ur i ai a hnia khuar sio bang in a ur dah heh tuar har law law i. Ciaman in I nu le pa ruat leng khaw I ang thil bul lai lo i inapui I nu leh pa i man in i âng lo hnak tu roh ze in dak ruai de lo ing.
- USA ah hla 6 lai um ruah ro I hang ing, inapui John awi nisiar in na thuhla ruat ttio de lai ing na ngai ze heh a can can fang in tu I pasal hmai ah khai thup ben lo in kap de nâng khaw. I lo ngaithiam tu hram law John na daih lo i lo ing khaw.
Zing khat tu zing nio in tho ing khaw kin inn dawngkhamnio hawng in sumpua cuan ing khaw hampa hing diam do vum ai mirang pil ngo hmel pha ngai ngai nupa nio nio in hiam ngaiin a vak hnak sik ing khaw, aw leivum mah daih hnak thawn hetin um ben heh ziang tluk in sunglawi i tiin ruat ing khaw John hnak hih ruang ro la la ing. Ciaman I ph ah balance tlawm nio nei hnak in John pawn hiam in khua lam ai kin inn ph call zur zo ing khaw I nu in ph pick up ai, John pawn I hiam thu I nu rel ing khaw a siang lo man i ni maw John tu khua ah um lo hang i tiin I rel man John hnak I ngaihhar hnak luar sin sin i. - USA ah pasal kang ah um napui ing khaw John kei na daih hlen pah ing hlanlai bang in.
Hla rei thah USA i um hnua fang kin inn ph he mi in kin call ai I pasal um lo man keimah in pick up ing ai leiba kin phing le, kin pa tlung fang kin pa rel leh ang ti ing khaw ph dah sal ing. Zanlam fang kin pa tlung ngai ngai ai ciaang thu pawl rel ing khaw a khuaruah har in kuak fawp in rawng leh ra vak in leh a thin thip hmel ngai in a haihawhpui suah ai pawi bang ngai e tiin tauhkham ah to khaw a thin cawl in a pa te ph ai, I ai can ze man- ziangman in na thincawl i? tiin i zawt fang, kin pa in nangmah na nei tuh hnak ah mite hmun ah tangka tam ngai zawng hnak nei i bang ing, cia tangka pawl heh tun i rul ruai hang e tiin I ti ai, I kuahruahhar ze zei khai lingthiam lo hang ing.
Keimah tu a mah tangka in I nu hnak vuah awng ing, inapui ciatih i lo in kin pa tu min hmun ah tangka apung (atoo) thawn zawng ai kumkhat hnua fang rul tuh tiin zawng hnak napui kumkhat a khim hlan ah a phing teito man I pasal heh a vansang mangbang hnak i tun ah.
Mite in leiba a phing hnua tu kin innsang ah khai hiam hnak um lo i hang, nisiar in kin pa in naper napui kin kham fang fang de i, thiri nungri in um kawm i ing. Inapui khua lam ai I nu le pa in ngawn hiam ngaiin um I vuah thei men i.
I lo i- I nu le pa USA ah mawtaw (car) mawi ngai ngai kin to hnak khai heh leiba in to i ing kum tam ngai sung rul tuh in lei hnak i. Ph leh TV pha pha, hnik puan mawi mawi I hmang hnak khai heh a hmang menma ing, a ngai ngai ti fang in yu kin innsungsang thu hla tu keimah in ling ber ing. I innsangpa le zu ding thei kuakfawp thei casino feh hmang thah thah ta si pasal nei bawngsia ngai ing ti heh i lo ling sah tu hram ih I nu le pa.
(Johna hmuah maw i daih lo hnak bawn ngam de lo i khaw)
Van ai va bang in zuang thiam ing lai maw khawp lo in khua lam tiang zuang ang khaw John hnenah feh in John hnak diik ngaiin kuah in thut dek i hiam napui bang e , inapui tun law law se ngawn I thinlung sung lek in ian na ngai hrih ngawn ang. Cung Pathian in rem ti le khaw naper te ngah leh ang khaw ciafang John nangmah na tawk tuh rori in khua lam ah tlung leh tuh ing I lo iang tu hram law tiin he lai in hnuk na sat ing. John na daih ze lai pah ing, USA ah pasal nei napui ingkhaw tunnia tiang I mang ah khai na hmu tio pah de ing cen nisair in na thuhla heh ruat mualmo pah de lai ing khaw.
Cah hiam hnak : Nu leh pa te kin fa te heh USA leh ram dang ai um pawl in parcel tuh in a cah tu um le khaw a pasal tu tuh te pawl thuhla fiang ngai in kin ling hnua lek fang in hlat pha i. Hrekkhat pasal pawl tu USA ah hmin sia ngai, fenu kawp tio, naper pha tak in hiam lo, casino feh thei, zu ding si dawt thei tam ngai i. Ciaman in he lai a siar tu hmuah hmuah Pathian in khuaruat thiam hnak ning lo pe tu se law.
Ang ngai
S2
1:04 AM
Unknown
